Zahid Xəlil. "Damcılar"
Bir - birindən yapışan
Damcıya bax, damcıya
Bir - birindən tutanda
Oxşayırlar qamçıya.
Damcılar gör nə çoxdu,
Beşdi, ondu, yüz idi...
Damcılar mirvaridi, -
Damcılar quş gözüdü.
Bircə - bircə düşürdü,
Damcılar yavaş - yavaş.
Baxıb o damcılara
Lovğalanırdı bir daş:
- Damcılar bir - bir damıb
Bulaqlara yığılar.
Damcılar bərk deyil ha
Əl vursanız dağılar.
Amma mən möhkəm daşam
Qayalara yoldaşam...
Bu sözləri eşidib
Damcılar qəzəbləndi,
Bir-birini qovaraq
Qayalardan ələndi.
Onlar növbəylə durub
Eyni yerə düşdülər
Axırda bu lovğanın
Təpəsini deşdilər...
25.06.2019