Gazella subgutturosa

 

Antiloplar cinsinə aid cütdırnaqlı məməli heyvan

 

Bədəninin uzunluğu adətən 95-115 santimetr, çəkisi 18-33 kiloqram olur. Saatda 55-60 kilometr sürətlə qaça bilir. Erkəklərinin 30 santimetrə çatan liraşəkilli buynuzu var. Dişiləri adətən buynuzsuzdur və 1-2 bala doğur. Səhra və yarımsəhralarda dəstələr halında yaşayır. Müxtəlif ot bitkiləri ilə qidalanır, susuzluğa davamlıdır.

 

Ceyranlara yarımsəhra, səhra və düzənliklərdə, həmçinin İran, Azərbaycan, Əfqanıstan, qərbi Pakistan, cənubi Monqolustan, Cin, həmçinin Ermənistan, Gürcüstan və Orta Asiya ərazilərində təsadüf olunur.

 

Ölkəmizdə vaxtilə Qazaxdan Bakıya qədər olan geniş arealda yayılmışdılar. Onlara daha çox Qarabağ və Muğan düzlərində rast gəlmək olardı. XX əsrdən sonra ceyranın yayılma arealı və sayı xeyli azalsa da, qoruq və yasaqlıqların artırılması nəticəsində bu prosesin qarşısı alınıb. Hazırda yalnız qoruq ərazilərində təsadüf olunan ceyranın Azərbaycanda əsas yayıldığı ərazi Şirvan və Abşeron Milli Parkı, Bəndovan və Korçay Dövlət Təbiət Yasaqlıqlığıdır. Sayları 8000-dən bir qədər çoxdur.