Farsca "bağırsaq" anlamına gələn Rud qədim simli çalğı alətidir. Orta əsr Azərbaycan klassiklərinin əsərlərində təsvir edilən rud Nizami Gəncəvinin "İsgəndərnamə" əsərində belə vəsf olunub:

Müğənni, çal rudu, gəl dadıma çat,

Məni bu amansız yuxudan oyat.

Bəlkə, rudun səsi axar çay kimi

Dincəltsin susamış yanar qəlbimi.

Saray çalğı aləti hesab edilən rud XVI-XVII əsrlərə kimi Azərbaycan ərazisində istifadə olunub. Rudun ilk nümunələrinin çanağı balqabaqdan, simləri isə ipək sapdan və yaxud bağırsaqdan hazırlanıb. Bu, aparılan araşdırmalar zaman məlum olub. Onun xarici görünüşü də balqabağı xatırladır. Quruluş etibarı ilə başqa simli çalğı alətlərindən fərqlənən rudun üzünün yarısı balıq dərisi ilə, qalan hissəsi isə şam ağacından hazırlanmış üzlüklə örtülür. İlk zamanlar barmaqla, sonralar isə yumşaq materialdan hazırlanmış mizrabla çalınıb. Çanağı tut, ərik, qolu və kəlləsi qoz, aşıqları armud ağacından hazırlanır. Rudun qoluna 12 pərdə bağlanılır. Bəm səsə malikdir. Alətin ümumi uzunluğu 860 mm, çanağının uzunluğu 495 mm, eni 335 mm, hündürlüyü 170 mm, qolunun uzunluğu 285 mm-dir.