Yelloustoun milli parkı
Yellowstone National Park
Yelloustoun milli parkının əsası 1872-ci ildə ABŞ-da qoyulub. Planetimizin ən qədim milli parkdır. Üç ştatın (Vayominq, Aydaho və Montana) kəsişməsində, qayalıq dağlardakı yüksək yaylada yerləşir. Ərazisi təxminən 9 min kvadrat kilometrdir.
1976-cı ildə unikal landşaftı, heyrətamiz təbii abidələri və burada yaşayan nadir heyvan növləri sayəsində parka beynəlxalq biosfer qoruğu statusu verilib.
Parkın yerləşdiyi ərazi təbii möcüzələrlə zəngindir, belə ki, burada ABŞ-ın ən böyük dağ gölü, çoxsaylı şəlalələr (300-dən artıq), kanyonlar, göllər, çaylar, mağaralar və iynəyarpaqlı meşələr yerləşir.
Qoruğun flora və faunasını 2 mindən artıq bitki növü və 600-dən çox məməli, balıq, quş və sürünən növü təşkil edir.
Çoxsaylı qeyzerlər, isti bulaqlar və palçıq vulkanları Yelloustoun milli parkına dünya şöhrəti gətirib.
Parkın ərazisində 3 minə yaxın qeyzer mövcuddur. Onların içərisində dünyanın ən böyük - “Steamboat Geyser” qeyzeri, həmçinin isti su şırnağını 40 metrdən hündürə püskürən məşhur “Old Faithful” qeyzeri də var.
Yelloustoun milli parkı ABŞ-da ən çox ziyarət olunan parklardan biridir. Hər il bura 2 milyondan çox turist gəlir. Park 1978-ci ildən etibarən UNESCO-nun Dünya irsi obyektidir.
26.10.2016
.jpg)
