İsmayıl İmanzadə. "Gerbim, himnim, bayrağım"
Sərvətimdi, varımdı,
Yenilməz vüqarımdı.
Andım, ixtiyarımdı
Gerbim, himnim, bayrağım!
Sinəmdəki bu həvəs,
Şəhid qanına əvəz.
Aləmə salıbdı səs
Gerbim, himnim, bayrağım!
Ana Kürdü, Arazdı,
Vəsf eləsəm də, azdı.
Təzə bahardı, yazdı
Gerbim, himnim, bayrağım!
Varlığımdır, səddimdir,
Basılmaz sərhədimdir.
Səsim, imzam, xəttimdir
Gerbim, himnim, bayrağım!
Kəpəzdi, Savalandı,
Ürəyimdəki qandı.
Anam Azərbaycandı!
Gerbim, himnim, bayrağım!