Mir Sabir. Tapmacalar
Evin bucağı,
Ana qucağı.
Qucaqda yatdı,
Tez boya çatdı.
(Beşik və körpə)
***
Göydən gələ-gələ,
Düşür gilə-gilə.
Tapın adı nədir?
Gərək hamı bilə.
(Yağış)
***
Görən deyir cansızam,
Mən qansoran qansızam.
Gölməçələr məskənim,
Tapın hansı vız-vızam?
(Ağcaqanad)
***
Bir sapım var, ucundan
Tutub getsən əgər sən.
Dünyanın hər yanına
Gedib çıxa bilərsən.
(Yol)
***
Uzaqdan par-par
Parıldayırsan.
Hey... gecə-gündüz
Şırıldayırsan.
Səs-küyün niyə
Hər yanı basıb.
Söylə kim səni
Qayadan asıb?
(Şəlalə)
***
Nə fildir, nə krandır,
O hansı pəhləvandır?
Özündən neçə dəfə
Ağır-ağır şeyləri
Qaldırıb aparandır?
(Qarışqa)
***
Nə əti,
Nə ayağı var.
Yaxşı paltar
Yumağı var.
(Paltaryuyan maşın)
02.12.2017