Bir xan qəfəsdə bülbül saxlayırdı. O, qəfəsi qızıldan düzəltdirmişdi. Qəfəsin ətrafında hər cür güllər əkdirmişdi. Lakin bülbül heç oxumurdu.

Bir gün xan dedi:

— Mən onu yaxşı bəsləyirəm. Bu quş isə heç oxumur. Buraxın onu çıxıb getsin. Ancaq izləyin, görün hara gedir.

Adamlar bülbülü izlədilər. Gördülər ki, bülbül bir kolun üstündəki bülbül yuvasına qondu və oxumağa başladı. Bunu xana xəbər verdilər. Xan dedi: “Deməli, bülbül öz yuvasında olduğu üçün oxumağa başladı”.

Həqiqətən də, hər kəsə öz Vətəni əzizdir. Vətən şirindir. Onu qorumaq lazımdır.