Xoşbəxtlik
Bir dəfə Xoşbəxtlik meşə ilə gedir . Qəfildən bir quyuya düşür. Oturub ağlamağa başlayır. Birdən yaxından insan ayağının səsini eşidib onu köməyə çağırır:
– Ey xeyirxah insan, çıxar məni buradan.
– Əvəzində nə verəcəksən? –deyə insan soruşur.
– Nə istəyirsən?
– Dənizə görünüşü olan, dəbdəbəli, böyük və gözəl bir ev istəyirəm.
Xoşbəxtlik onun istəyini yerinə yetirir və insan sevincək onu quyuda qoyub qaçır.
Xoşbəxtlik yenə hönkür-hönkür ağlayır. Yenə də səs eşidib haraylayır: – Ey xeyirxah insan, çıxar məni buradan.
– Əvəzində nə verəcəksən? – deyə bu insan da soruşur.
– Nə istəyirsən?
– Ən bahalı markadan olan gözəl maşın istəyirəm.
Xoşbəxtlik ikinci insanın da istədiyini ona verir. Ancaq o da sevinərək qaçıb gedir və Xoşbəxtliyi quyudan çıxarmağı unudur.
Tamam ümidini itirdiyi bir vaxtda Xoşbəxtlik görür ki, kimsə yuxarıdan üzüaşağı baxır. Ağlamağını kəsib deyir:
– Ey xeyirxah insan, çıxar məni buradan, xahiş edirəm.
Bu insan onu quyudan çıxarıb yoluna davam edir. Xoşbəxtlik onun dalınca qaçaraq soruşur:
– Ey insan, mənə etdiyin köməyin əvəzində nə istəyirsən?
– Mənə heç nə lazım deyil, – deyə insan cavab verir.
Xoşbəxtlik bundan sonra onun dalınca gedir və heç vaxt ondan ayrılmır.
22.09.2021