Zahid Xəlil. "Davakar sərçə"

Ayağının altında
Qarı əzirdi sərçə
- Mən hamıdan güclüyəm, -
Deyib gəzirdi sərçə.

– Aha, buzun altında
Başqa bir sərçə də var.
Yaxşı düşdün əlimə
Səni döysəm nə olar?!

Zoğal boyda dimdiklər
Birdən uc-uca gəldi.
Bizim üstdəki sərçə
Coşub lap gücə gəldi.

Dimdiyi sındı birdən
Tələsik uçdu yerdən.
Buza düşən şəkliymiş
İndi anladı sərçə.
Özünü ürəyində
Möhkəm danladı sərçə.

22.05.2018