Qida Təhlükəsizliyi Agentliyi  “Sağlam məktəbli” layihəsi çərçivəsində  Samux rayonu Əhmədbəyli kənd, Lənkəran şəhər 10 nömrəli, Xırdalan şəhər 9 nömrəli, Tərtər rayon 6 nömrəli, Qusar rayon 4 nömrəli və Şəmkir rayonu Düyərli kənd 2 nömrəli tam orta məktəblərinin şagirdləri ilə maarifləndirici görüş keçirib.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, görüşdə şagirdlərə agentliyin həyata keçirdiyi maarifləndirmə tədbirləri haqqında ətraflı məlumat verilib, videoçarxlar təqdim edilib. 

Agentliyin regional bölmələrinin əməkdaşları tərəfindən məktəblilərə qida təhlükəsizliyinə dair ilkin vərdişlər, qablaşdırma məhsullarının qidaya təsiri, qida məhsullarında etiket məlumatları, fast food-un zərərləri, süd və süd məhsullarının faydaları barədə ətraflı məlumat verilib, şagirdlər arasında müxtəlif intellektual oyunlar keçirilib.

Görüşdə məktəbliləri maraqlandıran suallar cavablandırılıb.

Qeyd edək ki, “Sağlam məktəbli” layihəsinin həyata keçirilməsində əsas məqsəd məktəblilər arasında sağlam qidalanmanın təşviqi, qida təhlükəsizliyi anlayışının təbliğ edilməsi və şagirdlərə qida təhlükəsizliyi vərdişlərinin aşılanmasıdır. Layihə çərçivəsində bu ilin sonunadək Bakı şəhərində 20, regionlarda isə ümumilikdə 60-dan çox məktəbdə görüş keçirilməsi nəzərdə tutulub.