Zeytun yağı tökürəm
Molla bir nəfərlə yol yoldaşı olur. Şəhərdən ikisi şərikli bir qab qatıq alırlar. Yolun yarısında əyləşib nahar eləməyə başlayırlar.
Yoldaşı cibindən bir az qənd ovuntusu çıxarıb deyir:
– Mən öz tərəfimə qənd tökəcəyəm.
Molla: – Olmaz ki, onu hər tərəfə tökəsən?
Yoldaşı: – Yox, öz tərəfimə tökəcəyəm.
Molla: – Adamsan, çıxart hər tərəfə tök!
Yoldaşı inad eləyir ki: “Olmaz! Öz tərəfimə tökəcəyəm”.
Molla acıqlanıb cibindən bir şüşə zeytun yağı çıxardıb deyir:
– Mən də öz tərəfimə zeytun yağı tökəcəyəm.
Yoldaşı: – Molla, dayan! Nə qayırırsan? Heç qatığa da zeytun yağı tökərlər?
Molla: – Sənə nə var? Öz tərəfimə tökürəm də...
Yoldaşı: – Molla, axı o yağ duru bir şeydi, axıb bu tərəfə də gələcək.
Molla: – Bilmirəm. Mənə dəxli yoxdu. Ya qəndi qabın hər tərəfinə tök, ya da mən öz tərəfimə zeytun yağı tökürəm.
08.06.2022