Anqola Respublikası Afrikanın qərbində Atlantik okeanı sahilində yerləşən böyük dövlətdir. Anqolada zəngin almaz yataqları vardır. XV əsrin sonlarında burada Konqo dövləti ilə ittifaqda olan Vantu adlı qəbilə yaşayırmış. Ölkə Konqo kralının vassalı Anqolun adını daşıyır. 

Anqola 1482-ci ildən Portuqaliyanın müstəmləkəsi idi. 1960-cı ildə yerli əhali portuqallara qarşı üsyan qaldırdı və müharibə başlandı. 1975-ci ildə Portuqaliya Anqolaya tam müstəqillik verdi. Bu zaman yerli siyasi qruplaşmalar arasında hakimiyyət uğrunda qanlı mübarizə başlandı. Onlardan bəzilərinə xarici qoşunlar yardım göstərirdi. Müharibə 1992-ci ildə, hökumət üsyançılarla sülh bağladıqdan sonra sona yetdi. Amma sülhü qorumaq cəhdlərinə baxmayaraq, toqquşmalar indi də davam edir.