Rostropoviç Mstislav
Mstislav Rostropoviç 1927-ci il martın 27-də Bakı şəhərində anadan olub. Violonçel ifaçısı, pianoçu və dirijor, ictimai xadim, pedaqoq, SSRİ-nin xalq artisti (1966), “Qremmi” mükafatının beşqat laureatı Rostropoviç 1945-ci ildə Moskvada musiqi ifaçılarının III Ümumrusiya müsabiqəsinin qalibi olaraq violonçel ifaçısı kimi şöhrət qazanıb.
Rostropoviçin violonçel ustası kimi repertuarına klassik bəstələrlə yanaşı şəxsən onun üçün yazılmış 140-dan artıq müasir əsər də daxildir.
2002-ci ildə Londonun “The Times” qəzeti Rostropoviçi “hazırda yaşayan ən dahi musiqiçi” adlandırıb.
Rostropoviç xeyriyyəçilik fəaliyyəti ilə də məşhurdur. O, Rusiyanın uşaq müalicə müəssisələrinə yardım göstərən Vişnevski-Rostropoviç Xeyriyyə Fondunun prezidenti olub.
O, 2007-ci il aprelin 27-də Moskvada vəfat edib.