Böyük və ya Xoşbəxt ləqəbli I Manuel 1469-cu il mayın 31-də Lissabon yaxınlığındakı Alkoşete şəhərində doğulmuşdu. 1495-ci ildə Manuel taxta çıxdı. Portuqaliyanın "qızıl əsri" adlandırılan onun hakimiyyəti dövründə çoxsaylı ekspedisiyalar həyata keçirildi: Braziliya və Molukk adaları kəşf edildi, Hindistana (qəti olaraq Qoaya əsaslanaraq) və Çinə dəniz yolu açıldı. Vasko da Qama, Qaşpar Korte-Real (1500-cü ildə Nyufaundlendi kəşf etmişdi), Pedru Alvariş Kabral, Triştan da Kunya, Afonsu d'Albukerki o dövrün məşhur dəniz səyyahları idilər. Hakimiyyətin mərkəzləşdirilməsini davam etdirən, yeni qanunlar məcmusunu yaradan Manuel elmin himayədarı sayılırdı. Müstəmləkələrdən gələn vəsait hesabına o yeni binalar və gözəl saraylar tikdirirdi.