Sahəsi: 102 819 km2

Əhalisi: 319 min nəfər (2010)

Əhalinin sıxlığı: 3,0 nəfər/km2

Paytaxtı: Reykyavik (201 min nəfər)

Əsas dil: island

Dini etiqad: protestantlıq (87% lüteran)

Pul vahidi: İslandiya kronu

Dövlət quruluşu: respublika

İslandiya Atlantik okeanının şimalında cavan, ən böyük vulkan mənşəli adada yerləşir. Sayı digər ölkələrə nisbətən az olan əhalinin əsas məşğuliyyəti balıqçılıqdır.

Subarktik dəniz iqlimi şəraitində Qolfstrim cərəyanının yumşaldıcı təsiri hiss olunur. Yanvarın orta temperaturu O°C, iyul 12°C-dir, il ərzində 500 mm-dən 4000 mm-ə qədər yağıntı düşür. İslandiya Şotlandiyadan 798 km şimal qərbdə yerləşir. Adanın dəniz səviyyəsindən orta hündürlüyü 600 m-dən 950 m-ə qədərdir. Ərazisinin 15%-i buzla örtülüdür. Bu səbəbdən onun hərfi mənası "buzlar ölkəsi" deməkdir.

Şərqdə və şimal-qərbdə sahil xətləri dərin körfəzlər, sıldırım qayalar və fyordlarla kəskin parçalanmışdır, çox girintili-çıxıntılıdır. Cənub sahilləri nisbətən alçaqdır. Geoloji cəhətdən İslandiyada ərazi cavandır. Ada Orta Atlantika silsiləsinin suyun səthinə qalxması nəticəsində yaranmışdır. Onun mərkəzindən Yer qabığının böyük qırılma zonası olan rift dərəsi keçir. Ona görə də ada dünyanın ən fəal vulkan fəaliyyəti zonalarından biridir.

İslandiyanın ilk sakinləri Skandinaviyadan olan normanlar və İrlandiyadan gəlmiş keltlər olmuşdur. Onların nəsilləri ölkənin bütün müasir əhalisini təşkil edir. Əhalinin 2/3 hissəsi paytaxtda yaşayır. Burada İslandiyada olan yeganə universitet və əsası 930-cu ildə qoyulan dünyada ilk qanun veruci orqan-Altinq yerləşir. Ada əvvəlcə Norveçin, sonra Danimarkanın mülkü olmuşdur. Yalnız XX əsrdə respublika elan edilmiş və müstəqillik qazanmışdır.

Təsərrüfatın əsasını balıqçılıq və onun məhsullarının emalı sənayesi təşkil edir. Bu sahə ölkəyə gələn ixrac gəlirlərinin 70%-ni verir. Məhsulların xeyli hissəsi Almaniya və Böyük Britaniyaya ixrac olunur. Elektrik ener jisi çoxsaylı SES-lər və Geo TES-lərdə istehsal olunur. Qeyzerlərə İslandiyanın məşhur Böyük Qeyzer mənbəyinə (vadisinə) görə belə ad verilmişdir.