Sahəsi: 199 km2 

Əhalisi: 65 min nəfər (2009) 

İnzibati mərkəzi: Paqo-Paqo (5000 nəfər)

Rəsmi dillər: ingilis, samoa

Dini etiqad: protestantlıq (80%), katolisizm (20%)

Pul vahidi: ABŞ dolları

Dövlət quruluşu: ABŞ-ın mülkü 

ABŞ-ın mülkü olan Şərqi Samoa iki mərcan atolunda və altı vulkan mənşəli adada yerləşir. Onlardan ən böyüyü Tutuila adasıdır.

Okeaniyanın digər ölkələrinə nisbətən Şərqi Samoaya az turist gəlir. Təsərrüfatda balıqçılıq xüsusi əhəmiyyət kəsb edir. ABŞ-da istehlak edilən dondurulmuş və konserv olunmuş tunes balığının 1/4-i ərazinin əsas şəhəri olan Paqo-Paqoda yerləşən müəssisədən gəlir. Paqo-Paqo buxtası Sakit okeanın ən gözəl və dərin buxtalarından biridir.

Buxta milyon illər əvvəl vulkan kraterinin dəniz suyu ilə dolması nəticəsində yaranmışdır. Tutuila adasında əhalinin əsas hissəsi cəmlənir. Şərqi Samoa sakinləri hələ də iri ailə icmalarında yaşayaraq, keçmişin adətlərini qoruyub saxlayırlar. Lakin gənclər ənənəvi həyat tərzindən imtina edərək qərb dəyərlərinə üstünlük verir. Şərqi Samoa kəskin parçalanmış relyefə malik olan vulkan mənşəli adalardır. Adaların səthi mərkəzdəki yüksək rayonlardan sahillərə doğru alçalır, dik qayalar və buxtalar bir-birini əvəz edir. Adaların daxili rayonlarını örtən sıx tropik meşələr çoxlu sayda quş növlərinin, həmçinin kərtənkələ, uçan tülkü, ilan, siçovulun yaşamasına imkan verir.

Burada rütubətli tropik iqlim hakimdir, illik yağıntının miqdarı 5000 mm-dən çox olur və əsasən leysan yağışları formasında düşür. Dekabrdan martadək güclü qasırğalar olur.