İmmiqrasiya (mühacirət)
İmmiqrasiya elə bir prosesdir ki, bu zaman bir dövlətin vətəndaşları başqa ölkədə ya müvəqqəti, ya da uzun müddətə məskunlaşırlar.
Tarix boyu milyonlarla insan yaşamaq üçün yeni torpaqlara köçüblər. Belə hallarda ölkədən çıxıb getməyə emiqrasiya deyilir. İnsanlar öz ölkələrini ən müxtəlif səbəblər üzündən tərk edirlər və ya emiqrasiya edirlər. Onlar, həmçinin təqiblərdən, müharibələrdən, təbii fəlakətlərdən, ya da aclıqdan və ya xəstəliklərdən xilas olmaq üçün bunu edirlər. Bu səbəblər üzündən emiqrasiya edən adamlara qaçqın deyirlər. Bəzən isə insanlar öz maddi rifahlarını yüksəltmək üçün emiqrasiya edirlər.
XIX əsrin əvvəlindən 1930-cu illərə kimi olan dövr tarixdə ən kütləvi miqrasiya dövrüdür. 60 milyona yaxın adam yeni ölkələrdə məskunlaşdı. Onların böyük hissəsi Avropadan gəlmişdi, yarısından çoxu isə Amerika Birləşmiş Ştatlarına köçmüşdü. Həmin dövrdə ABŞ-da mühacirləri qəbul edən əsas mərkəz Nyu-York yaxınlığındakı Ellis-Aylenddə idi. Həmin dövrdə çoxlu insanların mühacirət etdiyi ölkələr sırasında Avstraliya və Cənubi Afrika əsas yerləri tuturdu.
13.04.2018