Kəkilli qara ördək ( lat. Aythya fuligula) — qaraördək cinsinə aid  köçəri quşdur. Qırmızı başlı ördəkdən biraz daha kiçikdir. Bu ördəyi iri və tünd qara rəngli başına və sarı gözlərinə görə digərlərindən ayırd etmək asandır. Açıq boz rəngli dimdiyi bir qədər qısa və daha genişdir. Bədən uzunluğu 40–47 sm, çəkisi isə 550–750 qramdır.

Avropa və Asiyanın bütün mərkəz zonalarında, Tundranın cənub sərhədlərindən Ukraynanın şimal sərhədlərinə, aşağı Volqa bölgəsinə, Qazaxıstan və Altay bölgələrinə qədər uzanan ərazilərdə yaşayır. Qışlamaq üçün ördəklər Avropanın qərb sahillərinə, Qara və Xəzər dənizinin sahillərinə, Aralıq dənizi sahillərinə və Şərqi Asiya ölkələrinə uçurlar.

Onlara ov etmək azaddır. Ov etmə mövsümü ən çox yaz və payız uçuşları zamanı baş verir.

Erkək fərd ümumiyyətlə dişidən daha böyükdür. Erkəklərin çəkisi 650 - 1050 qr, dişilərin isə 600 - 900 qr arasında dəyişir. Xarici görünüşcə də fərqlənirlər. Xüsusilə bütün fərqlər ördəklərdə cütləşmə mövsümündə müşahidə olunur. Erkəkdə lələklərinin yuxarı hissəsi mavi və ya bənövşəyi ton ilə qarışıq qara rəngə çevrilir. Erkək ördəyin başının üstündə uzanmış lələklərdən ibarət bir kəkil var. Qanadları və qarın nahiyəsi ağ rəngdədir. Dişinin lələkləri isə qəhvəyidir.

Böyük su göl hövzələrində, gölməçələrdə və sakit axan çayların kənarında yuva qurarlar. Qamış və kolların arasında yuva qurmağı sevirlər.

Ördəyin qidası əsasən heyvan mənşəlidir, lakin qida çatışmazlığı olduqda bitki də yeyirlər. Əsas yemi suda tuturlar. Bunlar molyuskalar, böcək sürfələri, xərçəngkimilər və kiçik balıqlardır. Suda böyüyən bitkiləri də heyvan yeminə əlavə olaraq istifadə edir.

May ayının sonunda və iyun ayında, suyun səviyyəsinin aşağı düşən vaxtlarında yuvalarını qurmağa başlayırlar. Dişi ördək tikinti ilə məşğul olur. Kol və uzun boylu otların örtüyü altında quru otlar arasında yer seçir və quru otlardan yuva qurur.

Dişilərin yumurta qoyması yalnız iyun ayında başlayır və təxminən 5 həftə davam edir. Yumurtaların sayı orta hesabla 6 ilə 10 ədəd arasındadır. Yumurtlama müddəti 23-25 ​​gün davam edir.

Dişi ördək balalarına qulluq edir. Ördək balaları tez böyüyür və iki aydan sonra gənc ördəklər lələklə örtülür və uçmağa başlayırlar. Sürülərdə birləşirlər və daha yaxşı qida axtarmağa başlayırlar.

Avqustun sonundan oktyabradək onların isti ölkələrə köçməyi baş verir. Əlverişli hava və yem mövcudluğu şəraitində köç noyabr ayına qədər də uzana bilir.