Şəfiqənin 13 yaşı var. Gəncə şəhərinin Mir Cəlal Paşayev adına 39 №-li orta məktəbdə 7–ci sinifdə oxuyur. Hobbisi şeir yazmaq, maraqlı faktlar və məlumatlar toplamaq, araşdırmalar aparmaqdır. Hind rəqslərini ifa etməyi çox xoşlayır. Bu, Şəfiqənin öz sözləridir: "Mənim açıq dərslərdə qrup işləri zamanı yazdığım cavablar həmişə sinif yoldaşlarımdan seçilir.
Bizə Azərbaycan dili və ədəbiyyatından dərs deyən İlhamə müəllimə mənə “Sən mənim kiçik beynimsən – deyir”. Şəfiqə birinci sinifdən başlayaraq bir çox məktəb tədbirlərində iştirak edib, Fəxri fərmanla, Diplomlarla mükafatlandırılıb. Şəfiqə özü də şeir yazır. Şəfiqənin ən çox sevdiyi şair Mirzə Ələkbər Sabir, ən çox sevdiyi şeir isə “Millət necə tarac olur olsun” şeirdir.
Nizami Gəncəvi, Səməd Vurğun və Zəlimxan Yaqubun şeirlərini də çox sevir. Onun dörd şeirini sizə təqdim edirik.
Xocalı, mənim Xocalım
Xocalı torpağı harda, qoxusu harda?
Niyə üstündə çiçək bitmir?
Niyə ağaclar bar vermir?
Yalnız qalmısan?
Yox, biz gələcəyik
O qoxu, o torpaq,
O çiçək, o ağac
Qayıdacaq, Xocalı, mənim Xocalım.
Vətən
Vətən hər bir insanın anasıdır,
Vətən bizim canımızdır, qanımızdır.
Vətən bizim üçün deyil,
Biz vətən üçün yaradılmışıq.
Vətənsiz həyat nəyə yarar bu dünyada,
Vətən yoxdursa nə gəzirik bu dünyada.
Vətən bizim həyatımız, Vətən bizim amalımızdır,
Vətən bu böyük dünyada bizim isti ocağımızdır.
Bayrağım
Sənsən mənim dayağım
Sənsən mənim ocağım
İsti yuvam bayrağım
Sən nə qədər desən
Əyilərəm qarşında
Sənsən bizi ucaldan
Zirvələrə qaldıran
Üç rənglisən
Mavi, qırmızı, yaşıl
Rənglərinlə dünyaya
Bürünübdür bayrağım
Sənsən mənim qüdrətim,
Sənsən mənim şanım
Hər kəsin dayağına duran canım bayrağım
Şeir aləminə xoş gəlmisən
Şeir aləminə xoş gəlmisən
Gör necə gözəldir,
Həyatın bəzəyidir.
Şeir aləmi
Bəxtiyardır, Şəhriyardır, Vurğundur.
Xoş gəlmisən şeir aləminə!
04.05.2017