Molla bir gün dostlarından birinə məktub yazırmış. Bir nəfər də onun yanında durub, o yazdıqca altdan-altdan yazdıqlarını oxuyurmuş. Molla axırda təngə gəlib məktubda yazır: “Əziz dostum, sənə çox şeylər yazacaqdım. Ancaq bu saat yanımda ədəbsizin biri dayanıb, hər nə yazıramsa, oxuyur”.

Kişi bunu da oxuyub hirslənir ki:

— Bu nədir? Sənin nə haqqın var, məni ədəbsiz adlandırırsan?

Molla deyir: — Çünki başqasının məktubunu oxuyursan.

Kişi deyir: — Mən nə zaman sənin məktubunu oxudum?

Molla deyir:

— İndi ki, oxumursan, nə bildin mən sənin haqqında ora nə yazmışam?