Tənbəl
İsti yay günü Tənbəl talada uzanıb yuxuya getmişdi. Günəş yuxarı qalxdıqca şüaları daha da isti olurdu.
Tənbəl bir də o vaxt oyandı ki, istidən bütün bədəni yanır, amma durub, kölgədə uzanmağa, yerini dəyişməyə tənbəllik etdi. Günəşə dedi:
– Ay Günəş, istidən bişdim axı. Nə olar, bir az o tərəfə, ağacların dalına çəkil.
Günəş gülüb dedi:
– Sən deyirsən indi mən boyda Günəş bir Tənbəlin arzusu ilə yerimi dəyişim?
Heç elə şey olar?
Tənbəl hirslənib qışqırdı:
– Demək, sən çəkilmək istəmirsən, hə!
– İstəmirəm.
– Aha, belə?! Onda mən də sənin acığına yerimdən tərpənməyəcəm. Elə buradaca uzanacam.
04.11.2021