Hisli toyuq (Dendragapus fuliginosus) Şimali Amerikanın Sakit okean sahili meşələrində yaşayan toyuq növüdür. O, Dendragapus obscurus ilə yaxından qohumdur və bu iki növ əvvəllər Göy toyuq adı altında eyni növ kimi təsnif edilirdi.

Yetkinlərin uzun dik quyruğu var və quyruğun ucu açıq boz rəngdədir. Erkək fərdlər əsasən tünd rəngdə olurlar. Ağ tüklərlə əhatə olunmuş sarı boğaz hava kisələri var. Yetkin dişilər isə qəhvəyi rəngdə olur, bədənlərinin alt hissəsində tünd qəhvəyi-ağ naxışlar var.  

Çoxalma mühiti Şimali Amerikanın qərbində Alyaska və cənub-şərqi Yukondan Kaliforniyaya qədər dağlıq bölgələrdə iynəyarpaqlı və qarışıq meşələrdir. Yuvasını kol və ya ağac kötüyünün altında gizlədərək qurur.

Yaşayış yerinin daimi sakinidir, lakin qışda özünəməxsus davranışı ilə gah gəzərək, gah da qısa uçuşlar edərək daha sıx meşəliklərə doğru hərəkət edir.

Normalda yerdə, qışda isə ağaclarda qidalanır. Qışda əsasən küknar və Duqlas küknarının yarpaqlarını, bəzən ladin və şamın yarpaqlarını yeyir. Yayda digər yaşıl bitkiləri, meyvələri  və həşəratları, xüsusilə qarışqalar, böcəklər və çəyirtkələri yeyir. Balalar yumurtadan çıxan ilk on gün ərzində həşəratlarla qidalanmalıdır.