Sərgi çox möhtəşəmdir. Bu, böyük bir hadisədir. Mən bir vətəndaş kimi, oxucu kimi Mədəniyyət Nazirliyinə öz minnətdarlığımı bildirirəm ki, belə böyük bir mərkəzdə artıq 10-cu dəfə sərgi təşkil edir. Çünki burada mən oxucularımla görüşə bilirəm, onlarla yaxından tanış oluram. Buraya gələn minlərlə balaca uşaqlar, şagirdlər, tələbələr bu kitabları əldə edəndən sonra gələcəkdə böyük nailiyyətlərə imza ata biləcəklər.

Bunu X Bakı Beynəlxalq Kitab Sərgisində Azərbaycan Dövlət İnformasiya Agentliyinin (AZƏRTAC) stendini ziyarət edən Azərbaycanın Əməkdar artisti Bəhram Bağırzadə AZƏRTAC-ın müxbiri ilə söhbətində bildirib.

Bu yaxınlarda yeni cırtdan nağıllarının işıq üzü görəcəyini diqqətə çatdıran B.Bağırzadə uşaqların mütaliəyə marağının artırılması üçün valideynlərin özlərinin kitaba maraq göstərmələrinin və oxumalarının vacibliyini vurğulayıb.

O, AZƏRTAC ilə hər zaman əməkdaşlıq etməyə, müştərək layihələr həyata keçirməyə hazır olduğunu deyib.