Çəyirtkə təpənin üstünə sıçrayıb orada yaşıl kürəyini günəşdə qızdırdı və pəncələrini bir-birinə sürtüb xırıltı ilə dedi:

- Bu gün əla gündür!

- Xeyr! Bərbad gündür! - quru torpağın daha da dərinliyinə hərəkət edən soxulcan dedi.

- Nə dedin? Necə gündür? - çəyirtkə təkrar-təkrar soruşdu - Göydə bir dənə də olsun bulud yoxdur. Günəş də çox gözəl parlayır. Kimdən soruşsan “Bu gün gözəl bir günün olduğunu” söyləyəcəkdir.

- Xeyr! Yağışlı hava və palçıqlı isti gölməçələr.... Bax bu gözəl gündür!

Lakin çəyirtkə onunla razılaşmadı.

- Üçüncü birisindən soruşmalıyıq! - deyə onlar qərar verdilər.

Bu zaman kürəyində şam iynələri sürüyən qarışqa dincəlmək üçün yaxınlıqda dayanmışdı.

- Qarışqa qardaş, deyə bilərsən, bu gün necə bir gündür? - çəyirtkə qarışqaya üz tutub soruşdu - Bu gün gözəl, yoxsa bərbaddır?"

Qarışqa pəncəsi ilə tərini sildi və fikirli halda dedi:

Bu suala gün batdıqdan sonra cavab verəcəm.

Çəyirtkə və soxulcan təəccüblənərək razılaşdılar: - Yaxşı, gözləyərik!

Gün batandan sonra onlar böyük bir qarışqa yuvasının ətrafında dayanıb, qarışqanı səslədilər:

- Əziz qarışqa! İndi deyə bilərsən bu gün necə bir gündür?

Qarışqa yuvasında qazılmış dərin keçidləri, yığdığı şam iynələri yığınını onlara göstərib dedi:

- Bu gün gözəl bir gündür! Mən yaxşı iş görmüşəm və indi rahat istirahət edə bilərəm!