Məmməd Aslan. Açıl, bənövşəm, açıl
Musiqi: Ramiz Mirişli
Dodaq büzmə, amandı,
Sənsiz hava yavandı.
Kol dibi qəribsəyib,
Açılmalı zamandı:
Açıl, bənövşəm, açıl!
Sənsiz quru şəkildim,
Aç ki dara çəkildim
Daha səbrim tükəndi,
Açılmasan, büküldüm,
Açıl, bənövşəm, açıl!
Baharım çaşbaş qalar,
Qar əriməz, qış qalar,
Çəmən çiçəklə dolsa,
Sənin yerin boş qalar,
Açıl, bənövşəm, açıl!
Gülümsə ləçək-ləçək,
Gülüşünü gül, içək!
Müşküllərin üzünə
Açılası tilsimtək
Açıl, bənövşəm, açıl!
Yönün bizə tuş olsun,
Qızlar sənə qoşulsun.
Mənim könül sirrimsən.
Açıl, sirrim faş olsun.
Açıl, bənövşəm, açıl!
Ürəyim göynədi ki,
Bu göynək köhnədi ki...
Sənli dünya dünyadı,
Sənsiz dünya nədi ki?! -
Açıl, bənövşəm, açıl!
14.07.2022