Mina Rəşid. Kəlağayı
Bu nə gözəl örpəkdi,
Kələğayıdır adı.
Elə bil ki, üstümə
Göydən naxışlar yağdı.
Albuxarı, Yelanı,
İstiotu, Heyratı.
Nənəmin çarqatıdır
Bayatıdır, bayatı.
Onunla xalça üstə
Sanki göylərə uçdum.
Bu rənglər dünyasında
Göyqurşağını qucdum.
O Basqaldan başlanan
Nağılımdı, nəğməmdi.
Şəki, Şirvandan keçib
Qarabağıma gəldi.
O cıdır atlarının
Boynunda qırmızıdır.
Xonçaların bəzəyi,
Min istək, min arzumdur.
Heyran etdi dünyanı,
Hamı ondan danışır.
Ona buta yaraşır,
Xarıbülbül yaraşır.
