Məktəbə gedir artıq

Bizim balaca İnci.

Dərslərə səy göstərir,

Birincidir, birinci.

Bir gün masanın üstdə

Düzülmüşdür kitablar.

Mübahisə başladı,

Lovğalıq etdi onlar.

"Riyaziyyat" öyündü:

- Mən ən vacib kitabam!

Ən çox məni oxuyur,

İnciyə çox lazımam.

- Yox, mən daha vacibəm, -

Dilləndi "Ana dili",

- Hərifləri bilməsə,

Yaza bilməzdi İnci.

-Yaman lovğalanırsız,-

Dedi, "Həyat bilgisi",

- Mənəm, bunu bilin ki,

İncinin sevimlisi!

Əllərini yellədi,

Güldü ürəkdən İnci:

- Hər bir kitab vacibdir,

Fərqi varmı neçənci?

Hər biriniz əzizsiz,

Hər kitabın öz yeri.

Mən çox şeylər öyrəndim

Oxuduqca sizləri!